Ciorcail

Ciorcail                                      (Translation)

Tá boladh binn na móna
‘s ceol críonna na rónta
ag caisirnínigh tríd an aer.
Tá cór na réaltaí ag canadh
‘s corr-néal fánach
ag damhsa go mall-leasc thar an spéir.

Cuireann súid i gcuimhne dom
go bhfuil an t-am ag sní uaim
gan réiteach dom’cheisteanna go léir.
Ritheann timpeall m’intinn iad
‘is suaitheann m’inchinn iad:
ní chím aon shlí shoiléir.

Ba mhian liom mo smaointe
a bheith cruinn ‘is cinnte
– ní dóigh liom gur mór í an ghuí,
‘is tosú shaoil nua
gan bhrú néil a’dua
-in éadóchas a dhéanaim m’impí.

Go deo ‘is choíche
tagann ceol na hoíche
mar bhalsam ar m’anamsa tinn,
Tumaim istigh san fhuaim
‘is tagann faoiseamh chugam
atá suaimhneach, geal ‘is binn.

Comments are closed.